Talið av kvinnum, sum fáa børn einsamallar í Danmark er vaksið 27 prosent seinastu sjey árini. Tað vísa donsk hagtøl. Í 2011 vóru 907 børn fødd av kvinnum, sum ikki høvdu nakran mann, og í 2018 var hetta talið vaksið til 1.148 børn. 

Tað er serliga í danska høvuðsstaðnum, Keypmannahavn, at nógv børn verða fødd av einsamøllum kvinnum. Hvørja ferð 41 børn eru fødd í Keypmannahavn verður eitt barn fødd av eini einsamallari kvinnu, har eingin pápi er upplýstur. Í Miðjyllandi er talið eitt út av hvørjum 62 børnum. Tað skrivar danska avísin Berlingske.

Heili 60 prosent av kvinnunum, sum eru í viðgerð á gitingarfremjingarstovuni "ViaNeo Stork Klinki" í Keypmannahavn, eru einsamallar, skrivar Berlingske.