MATVIT: Ráðstevna um jarðarbrúk og matsjálvbjargni í Føroyum
Komandi leygardag, tann 14. mars, verður ráðstevnan MATVIT í Norðurlandahúsinum.
Ráðstevnan sprettir úr einum ynski at skapa vitan og kjak um umhvørvisvinarligt jarðarbrúk í Føroyum, og eisini um hvussu vit á bestan hátt kunnu stuðla og stimbra staðbundna matbúskapinum í Føroyum og eggja til eina gongd, ið kann gera Føroyar meira sjálvsveitandi við matvørum. Tað skriva fyrireikararnir Slow Food Føroyar, Norðurlandahúsið og Føroya Náttúru- og Umhvørvisfelag.
Á ráðstevnuni verður kjakast um hvussu korini fyri keyp og sølu av føroyskum rávørum kunnu betrast - bæði fyri framleiðaran og keyparan. Eisini er serfrøðingur innan agroøkologi boðin til Føroyar og fer hesin saman við ráðstevnuluttakarunum at skipa fyri verkstovu, har vit greina og kjakast um, hvussu hendan landbúnaðartilgongdin hóskar seg til føroysk viðurskifti.
Ráðstevnan er liður í einum granskingarsamstarvi millum Føroya Náttúru og Umhvørvisfelag, Slow Food Føroyar og Elisabeth S. Olsen (phd granskara) um veiðu, framleiðslu, sølu og býti av staðbundnum matvørum í Føroyum, skriva fyrireikararnir.
Øll eru hjartaliga vælkomin, og fyrireikarar vóna serliga, at persónar, sum fáast við ella kundu hugsa sær at fingist við jarðarbrúk, fara at koma. Ráðstevnan byrjar í Norðurlandahúsinum komandi leygardag kl. 9:00.
Mest lisið í farnu viku
Samband
Heygsvegur 8
490 Strendur