Eyðdis Hartmann Niclasen heldur, at soleiðis kann landið vísa í verki, at eisini okkara ovastu myndugleikar vilja ganga fremst og vísa á, at vit mugu halda samfelagshjólini koyrandi og syrgja fyri at vinnulívið hevur nógmikið av arbeiði til tøkar hendur. 

- Hetta er jú tað, sum hevur verið mælt øllum kommunum í landinum at gera. Og tað gera vit, sigur borgarstjórin í Vága kommunu.

Borgarstjórin vísir á, at tað serliga er ferðavinnan, sum er hart rakt av korona avmarkingunum, sum Landsstýri hevur sett í verk, og sum øllum kunnugt er ferðavinnan ein sera stór vinna í Vágum, har nógvir borgarar hjá kommununum arbeiða og hava sína dagligu gongd.

- Hópuppsagnirnar hjá Atlantic Airways í síðstu viku og nú í dag hjá Vága floghavn raka ikki bert einstaklingarnar sum eru uppsagdir, men eisini heilar familjur, tí nógvar familjur í Vágum hava tætt tilknýti til bæði Atlantic Airways og Vága floghavn. Harvið raka hesar uppsagnir eisini kommunurnar í Vágum sera meint, segði Eydis Hartmann Niclasen í gjár. 

Tí heldur hon, at tað hevði klætt landsstýrismanninum í Vinnumálum at sett gongd á arbeiði at byggja bygningin til Sjóvvinnustýrið sum skjótast, og soleiðis verða við til at økja um starvsmøguleikar fyri uppsøgdu fólkini, og harvið tryggja at inntøkumissurin hjá familjum og kommununum verður so lítil sum gjørligt. Um ikki annað, so tað tíðarskeiðið korona ávirkar ferðavinnuna og til uppsøgdu fólkini vónandi hava fingið størvini aftur, sigur Eyðdis Hartmann Niclasen, borgarstjóri í Vága kommunu.