Álopið fór fram tann 17. juni í 2016. Dylann Roof var tá 21 ára gamal. Morgunin eftir álopið var Roof handtikin í North Carolina. Hann játtaði seg sekan, og segði, at endamálið við álopinum var at byrja eitt rasukríggj millum hvít og svørt. Kirkjan, ið var álopin, er ein av teimum elstu svørtu samkomunum í USA og hevur leingi verið sett í samband við borgararættindastríðið hjá teimum svørtu í USA.

Eftir at ein sálarlig kanning hevði staðfest at Dylann Roof var egnaður at verða drigin fyri rættin, var hann í des. 2016 funnin sekur í 33 ákærupunktum um brot á føderala rasismulóggávu, umframt at staturin, South Carolina, ákærdi hann fyri 9 manndráp.

Á heimasíðu sínari og í eini dagbók, ið varð skrivað ímeðan hann sat fongslaður, hevur Roof gjørt seg til talsmann fyri rasuhaturi.

Eftir at Roof sjálvur hevði havt orðið í einar 5 minuttir, helt ákæruvaldið eina røðu, ið vardi útvið tveir tímar, har roynt var at sannføra nevningatingið um, at Dyann Roof átti at verða dømdur til deyða.

Stutt eftir, at røðan hjá ákæruvaldinum var liðug, avgjørdi eitt samt nevningating, at fylgja viðmælinum hjá ákæruvaldinum, og døma Dylann Roof til deyðis.

Í South Carolina er vanligt, at avrættingar verða framdar við ravmagni. Ein uppgerð frá 2010 vísur, at í miðal bíðar tann deyðadømdi í 178 mánaðir, t.e. knapt 15 ár, eftir at verða avrættaður. Umleið ein fjórðingur av teimum deyðadømdu doyggja ein náttúrligan deyða ímeðan bíðað verður eftir avrætting.