Umlegging til vetnistøkni ?
Battaríir verða ikki ein haldbar loysn...partvís er nógv ráevni til battaríini, og avmarkað nøgd er til, næst ein ovurstór dálking í framleiðslu.
Sum fiskivinnutjóð hava vit einki annað val enn brennikyknur og vetni - tí einki skip megnar 3 - 4 vikur, og meira enn tað, við battaríum. Tí mugu og skulu vit gera nakað við fyrireikingar til umlegging til vetnistøknina. Nógv varandi orka skal fáast til høldar, og er her møguleikin við havvindmyllum hvør á 8-15MW. Vestas hevur eina myllu á 8,3MW, og seta vit 100stk. upp á góðum plássum kring oyggjarnar, kanska í smærri bólkum á 25- 30 stk, kunnu 100myllur framleiða 3.735GWtímar um árið...góðar 10 ferðir okkara samlaðu elfremleiðslu.
1/3 av orkuni fæst aftur sum ravmagn gjøgnum brennikyknur, ið svarar til umleið 1.000 GWtímar. Leystligt umroknað til 85.000 tons av olju...ella tætt við tað nøgd okkara fiskifloti brúkti í 2019.
Kostnaður fyri 1MW vindorku...uppsett á landi er umleið 5.millkr. Ein mylla á 8,3MW sett út sum havvindmylla kostar allar helst meira pr. MW, so um vit siga 50.mill.kr. fyri eina myllu, verður kostnaðurin umleið 5 milliardir krónur fyri 100 myllur.
Slík ovurstór upphædd bara fyri vindmyllurnar er umleið tað tveir Eysturoyartunnlar kosta. Verður sama upphædd sett til elektrolysuskipanir og kompressiónstangar / áfyllingarstøðir til skipini, nærkast vit tí upphædd ein Suðuroyartunnil kostar.
Tí kann spurningur setast um tað ikki verður væl meira skilagott at nýta slíka upphædd til at leggja um frá fossilu orkuni og til eginframleidda orku til okkara fiskiflota, ið vit IKKI kunnu verða fyriuttan, heldur enn til ein tunnil, ið vit ikki avgjørt hava tørv á.
Farmaflutningur og millumlandasigling kemur eisini at hava tørv á øðrum brennievni enn olju, og at skula kunna bunkra her hjá okkum. Og eisini av tí orsøk verða vit hálvan vegna tvungin til at fáa gond á umlegging til vetnistøknina. Har er eingin onnur leið, og soleiðis er og verður tað...óansæð um vit vilja tað ella ikki.
Kári Thomsen
Mest lisið í farnu viku
Samband
Heygsvegur 8
490 Strendur