Í dag fellur dómur í rættinum í Keypmannahavn har fýra persónar, ið fyrr hava koyrt fyri Uber, eru ákærdir fyri hýruvognskoyring uttan hýruvognskoyrikort og uttan at hava akfar ið er góðkent til endamálið. Hendan hýruvognskoyringin var fingin í lag umvegis appina Uber.

Sambært ákæruritinum, so hava teir fýra bilførarnir, ið allir eru menn, forvunni sær ávíkavist 497.735 kr., 112.659 kr., 60.081 kr., og 40.078 kr., við at koyra fyri Uber í Danmark í 2015.

Ákæruvaldið metir, at tað skal kosta teimum bøtur á ávikavist 590.000 kr., 130.000 kr., 70.000 kr., og 45.000 kr. fyri brot á hýruvognslóggávuna.

Løgreglan í Keypannahavn hevur reist málini við støði í einum lista við nøvnum á danskarum ið hava koyrt fyri Uber í 2014 og 2015. Listan hava myndugleikarnir fingið frá hollensku skattamynduleikunum. Uber hevur høvuðsskrivstovu í Hollandi, og hevur latið upplýsingarnar inn í sambandi við eina skattagrannskoðan.

Løgreglan hevur, í fyrsta umfari, skuldsett ein lítlan bólk av bilførarum fyri at royna um hollendsku skattaupplýsingarnarr kunnu nýtast í rættinum. Bilførarnir, ið allir vilja frífinnast, halda uppá at tað kunnu upplýsingarnar ikki. 1500 aðrir persónar á listanum eru skuldsettir, men um ákæra verður reiðst veldst um úrslitið av rættarmálunum í dag.

Uber-tænastan kom til Danmark í 2014. Endamálið er at samskipa at privatfólk nýta egnan bil at koyra ferandi fyri pening. Danska rættarskipanin hevur skýrt tænastuna fyri ólógliga hýruvognskoyring. Tann 28 marts í ár boðaði Uber frá, at man fór at gevast við virkseminum í Danmark, eftir at ein nýggj hýruvognslóg staðfesti at Uber-tænastan var ólóglig.