-Vit hava seinastu tíðina verið í Danmark og yvirhálað øll spølini umframt gjørt annað viðlíkahaldsarbeiði, greiðir Julian Nolsøe, skipari, frá.

-Tá vit vóru staddir 50 fjórðingar úr Føroyum á veg vestureftir, fingu vit trupulleikar við eltalvuni til stýringina av høvuðsmotorinum og gjørdu tí av at koma til Føroya at fáa skaðan umvældan. Vit komu á Kollafjørð um átta-tíðina í gjárkvøldið og vænta at fara avstað aftur nú seinnapartin.

Føroysk-grønlendsk manning

Úr Føroyum gongur leiðin hjá Polar Nanoq til Íslands eftir fólki, áðrenn farið verður víðari undir Eysturgrønland at royna eftir kongafiski.

27 mans eru við Polar Nanoq - níggju føroyingar og 18 grønlendingar. Grønlendingarnir bíða í løtuni á Hafnarfjørðinum.

Julian Nolsøe væntar, at teir vera á fiskileið sunnudagin.

Verið við síðani 2005

Hann hevur saman við tríburabróðiri sínum, Emil, skiftst um at vera skipari á Polar Nanoq, síðani trolarin sum nýbygningur kom í grønlendska flotan í 2005.

- Vit plaga at skiftast annanhvønn mánaða, og tað hevur riggað væl øll árini, sigur dalbingurin, sum býr í Vestmanna saman við familju síni.

Hann hevur annars verið skipari í 23 ár tilsamans.

Føroyingarnir umborð eru yvirmenn á brúnni og í maskinrúminum umframt í kabússini.

Mest kongafiskur

Umframt í Eysturgrønlandi, roynir Polar Nanoq eisini í Vesturgrønlandi.

Høvuðsveiðan er kongafiskur, men teir hava eisini loyvi at royna eftir svartkalva og toski umframt makreli og sild.

Samlaða ársveiðan hjá teimum liggur um stívliga 10.000 tons.

-Veiðan í Eysturgrønlandi verður øll løgd upp á Hafnarfjørðinum, sum tá er nærmasta havnin hjá okkum, sigur Julian Nolsøe.

Trolarin nógva umtalu

Polar Nanoq fekk nógva umtalu í fjølmiðlunum í januar í fjør, tá ein av manningini varð tikin fyri morðið á íslendsku Birnu Brjánsdóttir.

Trolarin lá tá á Hafnarfjørðinum.

Maðurin varð í september í fjør dømdur 19-ára fongsulsrevsing umframt at skula rinda 450.000 kr. í endurgjaldi til foreldur hennara.