Nota til matna og til heimagjørt tøð
Brenninota er ein virðismikil urt sum kann brúkast til annað enn matna. Nota veksur vilt í Føroyum, men tað er ikki nógv til av henni, tí er gott at spyrja seg til ráðs áðrenn man tekur hana, sigur Rakul Arnfríð Dam, plantualari á Gróðurstøðini.
Best er at taka notuna til matna tá hon er góðar 20 cm, eftir hetta gerst hon støðugt beiskari. Tak 3. ella 4. hvørt skot og ikki taka heil øki. Sker stelkin av, og tak ikki urtina við rót, mælir Rakul til. Best er at vera í regnklæðum tá man tekur notu, so man ikki brennur seg. Nota brennur ikki eftir at hon er skoldað.
Nota, urtica dioica, kann brúkast eins og spinat til matna, og kann eisini turkast til te. Best er at taka hana áðrenn hon blómar í juni/juli mánaða, tá gerst hon sterk og beisk. Eftir blóming er notan góð at brúka móti forstoppilsi. Medisinskt hevur notan eisini verið brúkt í samband við trupulleikar við andadráttinum.
Nota kann eisini brúkast til tøð. Tá skal hon heintast, skoldast og liggja í vatninum til tað kølnar. Sìla notuna frá, og tú hevur tøð sum er væl egnað til grønmeti og salat. Tøð gjørt av notu hevur høgt innihald av jarni og nitrogeni, ella køvievni, greiðir Rakul Dam frá.
Tað ber eisini til at gera konsentrerað tøð við notu, sum skal tinnast áðrenn brúk. Legg notu í eina tunnu og dekka við vatni. Lat standa í eini tríggjar vikur og gera. Tað er umráðandi at røra í javnan. Eftir tríggjar vikur skal løgurin sílast. Áðrenn tú taðar skal tinnast 1:20 við vatni.
Sambært Rakul Arnfríð Dam, er hetta heimagjørda tøðið nógv umhvørvisvinarligari enn keypt tøð, sum m.a. inniheldur stórar mongdir av salpeturi.
Mest lisið í farnu viku
Samband
Heygsvegur 8
490 Strendur