Teistin á beding í dag
Ferðafólkatalið er nógv vaksið og millum annað tí er trupult at fáa “kabalina at ganga upp”.
Strandfaraskipið Teistin fer á beding í dag, og eftir ætlan fer skipið ikki aftur í sigling fyrr enn 13. juni. Í hesum tíðarskeiðinum fer Ternan at røkja Sandoyarleiðina burturav, meðan katamaranurin Issehoved skal røkja Hest- og Nólsoyarleiðina. Ternan fer tó at sigla farmatúrar til Hest fyrrapart týsdag og hósdag, og Sam fer at sigla farmatúrar til Nólsoyar fyrrapart týsdag og hósdag.
Tá ið Teistin er klárur aftur, fara skipini aftur á tær leiðir, sum tey vanliga røkja.
“Strandfaraskip Landsins er í tí støðu, at fleiri av okkara skipum í mun til krøv skulu á beding í 2018. Bedingstíðin fyri onkur av skipunum kann taka upp til 3 vikur, tí tað eru serligar og kravdar ábøtur, ið skulu gerast,” sigur Strandferðslan.
Strandferðslan sigur, at ein orsøk til at tað er trupult at fáa “kabalina at ganga upp” er, at ferðafólkatalið er nógv vaksið. Frá 2014 til 2017 vaks ferðafólkatalið við strandfaraskipunum við 125.000 ferðandi, og fýra teir fyrstu mánaðirnar í ár hava 11.000 fleiri ferðast við skipunum í mun til í fjør.
Mest lisið í farnu viku
Samband
Heygsvegur 8
490 Strendur