Pensjónsnýskipanin: Fyrsta hækkingin útgoldin seinast í mánaðinum
Nú fáa allir verandi pensjónistar fyrsta part av hækkaða útgjaldinum, sum varð tryggjað við pensjónsnýskipanini.
Seinast í hesum mánaðinum fáa allir verandi pensjónistar 400 krónur meiri útgoldið um mánaðin umframt eina eingangs upphædd á 2000 krónur fyri farnu mánaðirnar í hesum árinum. Restin verður útgoldin í 2019-2020, og í 2020 verður útgjaldið væntandi 5.635 kr. um mánaðin áðrenn skatt.
Tá pensjónsnýskipanin endaliga varð samtykt í apríl í ár, kundu pensjónistar í øllum landinum gleðast um at fáa umleið 1000 krónur meira at liva fyri hvønn mánað eftir skatt. Sagt varð, at verandi pensjónistar skuldu fáa ein part longu í 2018 og restina í 2019 og 2020. Seinast í hesum mánaðinum verður fyrsti parturin av hækkaða útgjaldinum frá Samhaldsfasta á konto hjá øllum verandi pensjónistum.
Umframt hækkingina í Samhaldsfasta varðveita allir verandi pensjónistar grundupphæddina, júst sum hon er í dag. Harafturat verður pensjónin fyri fyrstu ferð sjálvvirkandi prístalshækkað frá 2020. Tað verður árliga prístalshækkað við miðaltalinum av árligu gongdini í prístalinum og árliga lønarvøkstrinum á almenna arbeiðsmarknaðinum. Fyri verandi pensjónistar hevur pensjónsnýskipanin eisini við sær, at tað frá 2020 verður valfrítt, um ein pensjónistur ynskir mótrokning millum hjún ella ikki. Tað vil siga, at verandi pensjónistar kunnu velja, um útgjaldið skal verða ávirkað av inntøkuni hjá hjúnafelaganum.
Í Javnaðarflokkinum eru vit serstakliga fegin um, at tað eydnaðist samgonguni at geva pensjónistunum hesar tiltrongdu batar, soleiðis at allir verandi pensjónistar nú fáa meira at liva fyri í framtíðini.
Tíðindaskriv frá Javnaðarflokkinum
Mest lisið í farnu viku
Samband
Heygsvegur 8
490 Strendur