Í dag var HM-finalan í estetiskum fimleiki í Budapest í Ungarn. Vípan úr Fimleikafelagnum Støkk megnaði í gjár, sum einasta føroyska liði, at koma víðari í finaluna við stigatalinum 14,9, og í dag fingu tær so heili 15,55 stig.

Við samanlagda stigatalinum 30,45 endaðu tær á einum samlaðum 10. plássi, sum er besta úrslitið nakrantíð hjá einum føroyskum kvinnuunglingaliði til HM.  

Fimm lið úr Føroyum luttóku í kappingini, tvey kvinnulið og trý kvinnuunglingalið. Í kvinnuunglingakappingini endaði  Vípan úr Støkk á 10. plássi, Eina úr HF á 19. plássi og Nora úr HF á 20. plássi. Í kvinnukappingini endaði Hydra úr Ljósinum á einum 22. plássi og Hulda úr HF á 27. plássi.