Jacob Vestergaard: Ótryggleikin í føroysku fiskivinnuni veksur fyri hvønn dag
Tveir triðingar eru farnir av árinum, áðrenn vinnan veit, hvørjar kvotur tey hava at fiska.
“Hetta er ruðuleikakend fiskivinnuumsiting!” Tað sigur Jacob Vestergaard, fyrrverandi landsstýrismaður við fiskivinnumálum, nú uppboðssølurnar av norðhavssild og makreli eru útsettar.
Í eini viðmerking á facebook sigur Jacob Vestergaard, at landsstýrismaðurin vil bíða við uppboðssøluni, til “útlutanin av “vinar- og kenningarkvotum” er avgreidd”.
Hann sigur, at fyrr vistu feløgini við ársbyrjan, hvussu nógv tey høvdu at fiska og kundu leggja árið til rættis eftir tí.
“Tá kundu feløgini gera avtalur og skipa fiskiskapin og framleiðsluna soleiðis, at sum mest fekst fyri hvørt kilo, men soleiðis er ikki longur,” sigur Jacob Vestergaard.
“Nú uppboðssølurnar eru útsettar til 14. og 16. august, eru 2/3 farnir av árinum, áðrenn vinnan veit, hvørjar kvotur tey hava at fiska,” sigur hann.
Landsstýrismaðurin hevur avgjørt, hvør skal hava menningarkvotur
Jacob Vestergaard leggur eisini Høgna Hoydal undir at hava útvalt politiskt, hvør skal hava menningarkvotur, og hann sigur, at uppboðssølan er útsett, fyri at hesir politiskt útvaldu nýggju aktørarnir skulu fáa stundir til at umráða seg, so teir kunnu luttaka á útsettu uppboðssølunum.
“Vit hava ongantíð fyrr sæð so ruðuleikakenda og tilvildarliga umsiting, sum tann Høgni Hoydal, landsstýrismaður, stendur fyri. Føroyska fiskivinnan, sum hevur staðið fyri menningini av samfelagnum, hevur ikki uppiborið slíkt,” sigur Jacob Vestergaard.
Hann sigur at neyðugt er at gera nýggja lóggávu, har ongar ásetingar eru um uppboðssølu, so fiskivinnan aftur kann fáa rímiligar arbeiðsumstøður og gera neyðugu íløgurnar, sum framtíðartryggja vinnuna og føroyska samfelagið.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur