MYNDARØÐ: KÍ vinnur á HB í kvøld, siga Jógvan og Ólavur
R7 hitti teir báðar KÍ-veteranarnar Jógvan Jacobsen og Ólav Thomsen um 11-tíðina í morgun, tá ið Jógvan var í holt við at vinda fløgg á stong við KÍ-vøllin. Jógvan sigur, at hann hevur tænt KÍ í 15 ár við flaggarbeiðinum.
Hann nevnir tey trý 15 tølini í KÍ-tænastu.
- Eg spældi í 15 ár við fyrstu deild hjá KÍ, síðani var eg dómarí í 15 ár og nú í ár eru 15 ár farin við flaggaarbeiðinum. Í næstum (26. sept. blm.) fylli eg 80 ár, so nú er stundin at gevast, sigur hann.
Um sama mundið, sum Jógvan hongdi fløggini upp, komu Ólavur Thomsen og konan framvið. Eins og Jógvan er Ólavur ein legenda frá sonevnda 66-liðnum, Jógvan mest sum tiltikið skjótur høgri vongur og Ólavur sum stúttur miðverji, har eingin stóð honum kurl í luftdysti.
Dystartølini í einum kappingarári vóru ikki tá sum nú. Sambært faroesoccer.com spældi Jógvan við besta KÍ-liðnum í tíðarskeiðnum 1958-1970: 28 landskappingardystir (skeyt 14 mál) og tveir steypakappingardystir (tvey mál). Jógvan spældi ein landsdyst, tað var í (lítið) minniliga dystinum ímóti Íslandi í 1962, tá ið Føroyar taptu 10-0 fyri íslendsku vertunum.
Faroesoccer.com upplýsir, at fýra ár yngri Ólavur spældi á besta KÍ-liðnum í tíðarskeiðnum 1960-1973: 59 landskappingardystir og sjey steypakappingardystir og skoraði tvey mál, eitt í landskappingardysti og eitt í steypadysti. Ólavur spældi seks landsdystir, sambært faroesoccer.com.
Sum myndirnar vísa, so hugnaðu teir sær óført við práti um ymiskt. Vit spurdu teir um dystin í millum KÍ og HB í kvøld. Teir svaraðu við ein munn, at "KÍ vinnur á HB í kvøld".
Dysturin millum KÍ og HB í Betri-deildini byrjar klokkan 18.00. Livst, so spyrst, um lagið verður eins gott, tá ið fløggini skulu niðuraftur í kvøld.
Mest lisið í farnu viku
Samband
Heygsvegur 8
490 Strendur