Vestmanna og Miðvágur gjørdust stóru vinnararnir, nú Høgni Hoydal, landsstýrismaður, lutaði menningarkvoturnar út í gjár.  

Av teimum 48.000 tonsunum, sum vórðu útlutaði fingu Vestmanna Fiskavirki og Snarfrost í Miðvági góð 30.000 tons. Hesi loyvi fingu tey fyri 4 ár. Flestu av hinum loyvunum vóru bara fyri eitt ár.

Norðlýsið skrivaði í gjárkvøldið, at somu vestmenningar, sum fyri fáum árum síðani seldu fimm skip við loyvum til Klaksvíkar fyri 120 mió. krónur, nú hava fingið loyvini aftur, púra ókeypis, frá landsstýrismanninum.

“Kvotan, sum landsstýrið nú letur vestmenningum er m.a. tikin frá sama reiðarríð í Norðoyggjum, sum rindaði umleið 120 milliónir til kvotabarónarnar hjá Tjóðveldi í Vestmanna,” skrivar Norðlýsið.

Á hinari síðuni eru fólk ovurfegin. Eyðun Olsen, stjóri á Vestmanna Fiskavirki, segði við Dag og Viku í gjárkvøldið, at tað hevur avgerandi týdning fyri teirra virki, at tey nú fáa menningarkvotu.

“Síðani virksemið byrjaði aftur á Vestmanna Fiskavirki í 2011, hevur virkið samstarvað væl við tey stóru reiðaríini. Men síðani tey stóru uppisjóvarvirkini komu, hava tey landa til síni egnu virki, og tí hevur virkið í Vestmanna ikki havt so góða atgongd til rávøruna,” segði hann.

“Serliga tað at virkið veit 4 ár fram í tíðina, hvat tað hevur at arbeiða við, hevur stóran týdning, tí tað gevur møguleika at arbeiða meira málrættað,” segði Eyðun Olsen.