Summar  kvinnur hava meiri mótburð enn aðrar og eru væl minni forkelaðar enn vesturlendskir feministar, sum tær lítlan og ongan stuðul fáa frá.

Fyrsti kvinnuligi afghanski militeri flogskiparin, ið er útbúgvin, eftir at Taliban-stýrið fall í 2001, hevur nú fingið friðskjól í USA. Tað verður hildið stórur missur fyri afghanskar kvinnur, hvørs fyrimynd hon hevur verið í fleiri ár.

Niloofar Rahmani, 26 ár, er so gávað, at hon í 2015 varð send til USA fyri at fáa útbúgving sum hernarflogskipari. Tá tað frættist, regnaðu deyðshóttanir yvir Rahmani og familjuna úr ymsum islamskum londum.

Nú er hesin fyrsti afhanski kvinnuligi flogskiparin sloppin til eitt frælst land, har hon kann royna seg á jøvnum føti við onnur fólk í sínum yrki sum flogskipari.

Nakað samstundis var Aras Amiri, professari í teldufrøði, handtikin í Tehran, meðan hon vitjaði sína sjúku ommu og siga henni farvæl, um hon skuldi doyð.

Amiri arbeiðir fyri British Council í London. Hon er bert ein av fleiri iranskum kvinnum, ið arbeiða í Bretlandi ella í bretskari altjóða tænastu, men sum eru handtiknar og varðhaldsfongslaðar, meðan tær vóru heima í Iran og vitjaðu.

Hesar handtøkur eru farnar fram, áðrenn Trump forseti setti USA-Iran avtaluna hjá Obama o.f. Vestanlondum, t.m. Bretlandi, úr gildi. So tað er ikki í hevnisøku ímóti vestanlondum, at Amiri er handtikin. Talan er um reinan yvirgang frá iranskari síðu ímóti iranskum kvinnum, ið klára seg uttanlands.

Tann fongslaða Aras Amiri arbeiðir í toppstarvi hjá altjóða British Council og er tí eitt sjónskt offur fyri iranskum yvirgangi uttanlands, har Iran terroriserar. Undanførslan hjá prestastýrinum er, at Amiri er ein hóttan móti iranskari trygd.

Stutt áðrenn Amiri varð handtikin, tók iranska løgreglan Abbas Edalag, ein iranskt-bretskan professara í telduufrøði á Imperial College í London, tá hann var á vísindaligari ráðstevnu í Tehran saman við øðrum altjóða serfrøðingum.

Iranska stjórnin sigur, at professarin er undir illgruna fyri at vera partur í einum netverki av bretskum njósnarum.