Jú minni, globaliseringin ger heimin, jú fleiri fólk úr 3-heimslondum tráa eftir at flyta úr sínum miseydnaðum heimstøðum til rík kapitalistisk lond.

Nyttuvirðið í hesum landastrokum man vera stak misjavnt fyri vertslondini. Fleiri hava kanska so frægt av framdrift í sær til at klára seg væl har, tey koma. Men dastið dettur í almannakassan, ið stendur víðopin fyri øllum.

Spurningurin er jú, um andsøgnin millum eitt vælferðarsamfelag og opin landamørk ikki er so grov, at skipanin má søkka saman til skaða fyri øll.

Australia er tiltikið fyri strangan tilflytarapolitikk fram um flestu Vestanlond. Kortini tekur Australia ímóti 150-200.000 tilflytarum um árið, men tey flestu sleppa inn í hetta lovaða anglo-saksiska landið “down under”, tí tey hava handligan ella vitbornan førleika, rárar arbeiðsroyndir, útbúgving og serfrøði.

Havrekar, ið royna at sníkja seg inn í Australia, verða settir í savningarlegur, eitt nú á Papua Ný Guinea og oynni Manus, haðan tey verða send heimaftur.

Eingin skal droyma um at fáa uppihaldsloyvi frá myndugleikunum, ið ikki søkja fyrrenn eftir, at tey hava sníkt seg inn um mark til Australia. Tey verða send avstaðaftur við greiðum boðum um, at tey sleppa aldri inn.

Australia hevur sum onnur ringar royndir av “flóttafólkum” úr eitt nú Afrika og Miðeystri, tí hesi taka seg saman í yvirgangsbólkar, ið herja hampa fólk.

Í summar fekk Australia knappliga eina nýggja avbjóðing á flóttaøkinum. Landið var vertur fyri Commonwealth Leikum, ella “Friendly Games,” ið verða hildnir 4. hvørt ár í onkrum av londunum í bretska Commonwealth.

Eftir leikirnar í summar søktu 200 luttakarar, fleiri ítróttarfólk í heimsflokki,  venjarar og hjálparar teirra, um friðskjól í Australia. Onnur 50 eru ikki farin heimaftur, men hava fjalt seg og vóna at sleppa undan at verða send heim.

Eftir OL í London í 2012 hendi tað sama, tá 80 fólk søktu um friðskjól. Men tað vóru altso bert 1/3 av teimum, ið ikki vildu heimaftur úr Australia.

Ofta boða fólk løgregluni frá ólógliga tilfluttum ítróttafólki, ið tey halda seg hava sæð í gøtunum, og nøkur verða fangað. Í flestu førum er her talan um fólk úr heimsins “shitholes”, Rwanda, Uganda, Sierra Leone og Cameroon.