Tórshavnar kommuna hjálpir at rudda Føroyar leygardagin
Tórshavnar kommunan gleðist um ruddingarátøk og eggjar øllum borgarum at fara út at rudda á altjóða ruddingardegnum tann 15. september.
Tórshavnar kommuna skipar fyri at alt burturkastið, sum verður savnað í Tórshavnar kommunu á altjóða ruddingardegnum, verður koyrt á Kommunalu Brennistøðina. Kommunan veitir eisini posar til tey, sum luttaka í ruddingini. Posar kunnu heintast á gomlu brandstøðini í Varðagøtu 5. Tað skrivar kommunan á heimasíðu síni.
Altjóða ruddingardagurin Rudda Føroyar, sum verður 15. september, er triðja ruddingarátakið í Tórshavnar kommunu í 2018. Í vár skipaði kommunan fyri árligu ruddingardøgunum og norðurlendska átakinum Strandarudding 2018.
Á árligu ruddingardøgunum luttóku serliga skúlaflokkar, dagstovnar og eigarafeløg, og tilsamans vórðu 54,4 tons savnað í sambandi við tiltakið.
Strandarudding 2018 er eitt átak, har ruddað verður framvið sjóvarmálanum. Innsavnaða burturkastið verður greinað og bólkað fyri at fáa hagtøl yvir sløg av burturkasti fram við sjóvarmálanum.
Til Strandarudding 2018 luttóku ymiskar fyritøkur og feløg og ruddað varð framvið sjóvarmálanum á Signabø, Oyrareingjum, Sandagerði, Kaldbaksbotni, Hoyvík umframt í Kirkjubø – bæði í Sugguni og úti í Bø.
Samanlagt vóru 875 kg av burturkasti savnað. Áhugafelagskapurin Ringrás skilti og bólkaði tær 11.628 burturkastseindirnar. Nevnast kann,at heili 61% ella 7.147 eindir vóru úr plasti. Stórstu bólkarnir av burturkasti vóru:
• Glas, steintoy og leir – 3028 eindir
• Ikki eyðmerkt plast – 2947 eindir
• Reip – 1499 eindir
• Polystyren plast – 1067 eindir
• Træ – 898 eindir
Mest lisið í farnu viku
Samband
Heygsvegur 8
490 Strendur