Nú Xi Jinpeng (65 ár) hevur fingið játtað lívlangt einaveldi, líkt tí hjá Mao, frá ovastu leiðsluni á seinastu landstingi kinesiska kommunistaflokkinum, hevur hann táttað kverkratakið um barkan á kinesiska fólkinum á mangan hátt.

Eitt nú hevur kinesiska valdsapparatið sett í verk eftirlit við øllum tí kinesiska fólkinum, 1.400 mió einstaklingum, hvørs virksemi er undir politiskum eftirliti við eini elektroniskari poengskipan, m.a. við vakmyndatólum, sosialmiðlum, keypi og sølu heima sum úti, so hvør einasti persónur er undir umsjón 24/7.

Hon virkar so, at øll fáa “próvtøl” (karakter) fyri alt, tey gera. Alt tað, ið stjórnin loyvir, og sum styrkir politiska valdið, gevur pluss-stig, og allar gerðir hjá fólki, ið býður stjórnarvaldinum ímóti, geva minusstig. “Stigatalvan” hjá hvørjum einstøkum, avger, um tey fáa útbúgving, starv, loyvi til at virka, ferðast o.t.

“Stóribróðir vekir yvir tær,” sum George Orwell so væl sigur tað í bókini 1984.

Tey, ið hava tað svárast í Kina, eru tey kristnu. Ikki ein kristin bók sleppur at verða útgivin í Kina. Politi brýtur inn í kirkjur, samkomur og húsmøti, sorar og brennir innbúgv, bíbliur, bøkur, krossar og alt, ið kristin hava kært. Teirra kristnitrúgv verður knýtt at heiminum, og teirra frælsi sett undir eftirlit og skert.

Hetta er ringasta kristnijagstran í Kina síðan dagar Maos, skrivar sjálvt AP. Henda forfylging er partur av tí nýggja “tankaeftirliti,” ið fólkið skal liva undir.

Kina er ikki enn ringasta land, har kristin líða jagstran, fongsul og píning.

Norðurkorea forfylgir og revsar kristin mest. Karl Marx segði sum kunnugt, at “Átrúni er opium fólksins.” Besta bulvirki móti allari marx- og islamismu er jú kristnitrúgvin. Tí verða kristin forfylgd í sosialistiskum og islamskum londum.

Í t.d. Norðurkorea, Irak, Sýria, Iran, Sudan o.ø. sosialistiskum og islamskum londum verða kristin rænd, neyðtikin, meislað og myrd, skrivar sjálvt AP.

Heimsins fjølmiðlar geispa og venda blindu lið til illgerðirnar móti kristnum. Í yvir 144 londum eru tey kristnu undir støðugum álopum, mental-, krops- og, sálarligum yvirgangi. Kirkjur og samkomuhús verða brotin niður.

80% av allari forfylging í heiminum vegna trúgv er nú vend ímóti kristnum. Vit eru mál fyri heimsumfatandi týning. Politikarar her hjálpa til við atgerðarloysi.