“Hýsan er umsíðir rættiliga komin fyri seg aftur, og óvanliga nógv var at fáa av hvítingi.” Tað skrivar Havstovan á síni heimasíðu í dag.

Magnus Heinason gjørdi tær árligu yvirlitstrolingarnar á føroyska landgrunninum í august, har høvuðsendamálið var at fáa til vega tilfar, ið skal nýtast í stovnsmetingunum av toski, hýsu og upsa. Eisini vórðu magakanningar gjørdar, og hitin í sjónum varð máldur.

“Tað var nakað minni at fáa av toski í mun til í fjør og komst hetta mest av, at eitt einstakt stórt hál norður-vestur úr Suðuroy ikki gav nakað í ár,” sigur Havstovan. Tað var tó nógv at fáa av smáum toski, sum var ársgamal.

“Tað var ein stór øking fyri hýsu, sum nú nærum er komin upp á tað høga støðið, sum var í 2002. Eisini var óvanliga nógv at fáa av hvítingi. Lítið var at fáa av upsa og nøgdin av longu var eisini minkandi. Magakanningarnar vístu, at tað var nakað til av nebbasild og lítið av krabbadýrum á botni,” sigur Havstovan.

Ein merktur toskur varð fingin aftur á túrinum.