Føroyameistararnir vórðu heiðraðir á Ráðhúsinum í Havn í gjárkvøldið. Borgarstjórin hevði boðið teimum inn á gólvið, nú teir vunnu 23. føroyameistaraheitið, sum er føroyskt met.

Annika Olsen, borgarstjóri, helt stutta røðu fyri HB'arunum. Hon segði m.a. "Síðani landskappingin fór at telja 27 umfør, hevur enn eingin vunnið meistaraheitið so tíðliga, sum tit hava gjørt tað nú. Eingin er fyrr blivin meistari longu í 23. umfari, so hetta er ikki nakað, tit hava vunnið við berum hepni. Nei, hetta vitnar um dugnaskap, evni og hegni, ið tit eiga meira av enn nakar annar...Tit eru nummar eitt, og tí kunnu vit eisini fegnast um, at Havnin er nummar eitt – og tað takka vit tykkum hjartaliga fyri, segði Annika Olsen, borgarstjóri, at enda, áðrenn eitt trífalt hurrá rungaði um Ráðhúsið.