Finski uttanríkisráðharrin vann atkvøðugreiðsluna um misálit
Finski uttanríkisráðharrin, Timo Soini, sum fekk harðar atfinningar tí hann tók lut í einum mótmælistiltaki móti fosturtøku, tá hann var á vitjan í Kanada, vann atkvøðugreiðsluna um misálit, sum varð reist móti honum í ríkisdegnum orsaka av hendingini.
Fýra andstøðuflokkar í finska ríkisdegnum reistu í farnu viku uppskot um misálit móti Timo Soini, uttanríkisráðharra. Orsøkin var, at hann undir eini vitjan í Kanada tók lut í eini gudstænastu, sum felagsskapurin Pro Life, ið virkar ímóti fosturtøku, skipaði fyri.
Finski “justitskanslarin” (sum svarar til okkara Løgtingsins Umboðsmann) skuldsetti týsdagin í farnu viku Timo Soini fyri hendingina, og segði at hendingin var “ivasom”. Hann segði eisini, at ráðharrin ikki í nóg stóran mun hevði víst varðsemi og afturhaldni, og at vandi var fyri, at framferðin kundi tulkast sum almenna støða Finnlands til málið.
Í tí eina samgonguflokkinum í Ríkisdegnum var ikki semja um málið um misálit. Kortini vann uttanríkisráðharrin atkvøðugreiðsluna við 100 atkvøðum móti 60. 18 atkvøður vóru blankar og 21 tinglimir vóru burturstaddir undir atkvøðugreiðsluni.
Sjálvur sigur Soini við almenna finska kringvarpið Yle, at hann tekur atfinningina hjá justitskanslaranum til eftirtektar, og at hann hevur lært av hendingini. Kortini heldur hann fast við, at tað sum hann gjørdi var ikki ólógligt.
Forsætiráðharrin, Juha Sipilä sigur, at stjórnin stuðlar Soini, men hann sigur samstundis, at skuldsetingin hjá justitskanslaranum er rímiligur.
Soini er trúgvandi katolikkur, og virkin mótstøðumaður móti fosturtøku.
Kelda: Världen idag
Mest lisið í farnu viku
Samband
Heygsvegur 8
490 Strendur