Ungi kongurin í Thailandi, Maha Vajiralongkorn hevur nú tikið við sum persónligur eigari av krúngóðsinum, ið er vert 10-tals miljardir dollarar.

Henda risa royala ognin ger hann til heimsins ríkasta kong og tískil ein av heimsins ríkastu monnum.

Thailand er stórt eftir evropiskum máti, 513.000 km2, og fólkatalið er einki minni enn 70 mió. Miðal ársinntøkan pr íbúgva er $8.000.

Sammett við londini í landsynnings-Asia er Thailand hitt ríkasta við sterkum búskapi í góðum vøkstri.

Thailendska fólkið forgudaði pápi nýggja kongin. Hann æt Bhumibol Adulyadej, doyði í fyrraárið, og fólkið syrgdi tann sála monarkin í eitt heilt ár.

Í 2012 varð kongsognin mett til 200 mia kr og hildin at vera meiri verd nú.

Ein nevnd av útvaldum álitismonnum hevur umsitið grunnin, har kongsvirðið hevur ligið í varðveitslu, síðan hann doyði.

Flytingin av hesum risa virðum til unga, núverandi kongin er ætlað sum ein roynd at kjølfesta hansara nýggja myndugleika og tign til landsins heiður.

Afturfyri at fáa hesa stóru formúu til ognar vegna thailendska fólkið hevur nýggi kongurin bundið seg til at gjalda skatt av inntøku frá kongsgóðsinum.

Hetta er fyrsta ferð, thailendski kongurin hevur goldið skatt í søguni.

Men vit kunnu ugga okkum við, at tað hevur ungi monarkiski alvin, Maha Vajiralongkorn, tíbetur ráð til.

Thailendska fólkið gleðir seg um sín nýggja kong, ikki minst tí hann er sonur sála pápa sín og hevur tískil uppiborið at vera heimsins ríkasti kongur.