Seinastu tíðina hava altjóða fjølmiðlar gjørt nógv burturúr málinum um horvna journalistin Jamal Khashoggi, sum 2. oktober fór inn á saudiarabisku sendistovuna í Istanbul, og síðani sá eingin hann aftur. Men hví hevur henda søgan vakt so stóran áhuga?

Ikki bara journalistur

Jamal Khashoggi var ikki bara ein atfinningarsamur journalistur, men hann hevði tætt tilknýti til kongsfamiljuna, og var roknaður sum ein ið kundi hótta valdið hjá krúnprinsinum í Saudi-Arabia.

Sjálvur var hann ikki kongaligur, men hoyrdi til eina sera navnframa ætt í Saudi-Arabia, og gjøgnum nógv ár hevði hann tætt samband við kongsfamiljuna umvegis fleiri álitisstørv. Til dømis var hann ráðgevi hjá stjóranum fyri fregnartænastuna, og á ungum árum var hann millumgongumaður millum kongsfamiljuna og Osama bin Laden. Hetta gjørdi hann til ein lyklapersón, ið kundi hótta valdið hjá kongshúsinum.

Longu í 70-árunum meldaði hann seg inn í Muslimska Brøðralagið, og hóast hann í sínum greinum vísti til frælsisrættindi og fólkaræði, so duldi hann ikki, at hansara politiski dreymur var at virka fyri Muslimska Brøðralagið í Miðeystri. Millum annað hetta gjørdi hann til fígginda hjá kongshúsinum, sum sær Muslimska Brøðralagið sum erkafígginda.

Khashoggi stuðlaði harumframt eisini Arabiska Várinum, sum í 2011 hevði við sær kolveltingar í Tunis og Egyptalandi.

Eftir at vera flýddur til USA í 2017 stovnaði Khashoggi ein politiskan flokk ella felagsskap við navninum “Fólkaræði fyri arabiska heimin nú”. Endamálið var at virka fyri og stuðla politiskum islam gjøgnum demokratisk val í Miðeystri. Fyri Saudi-Arabia varð hetta roknað sum ein beinleiðis krígsavbjóðing.

Atfinnarar hvørva

Tí var Khashoggi nógv meira enn bara ein atfinningarsamur journalistur. Hann var samtíðis ein beinleiðis hóttan móti kongshúsinum, og slíkir persónar hava tað við at hvørva.

Hann er nevniliga ikki tann fyrsti atfinnarin ella kappingarneytin hjá kongshúsinum, sum verður burturfluttur. Fleiri prinsar eru horvnir, og nú lóðar, at krúnprinsurin, eftir hendingina við Khashoggi, møguliga verður skiftur út við Saudi Arabiska sendimannin í USA, Khalid bin Salman, sum er ein yngri beiggi hjá krúnprinsinum. Hann fór í síðstu viku brádliga heim til Riyadh, uttan at grundgeva fyri, hví hann fór. Og tað í sær sjálvum er løgið, nú Saudi-Arabia er í eini av sínum størstu kreppum, uttan at sendimaðurin er til staðar í Washington.  

Lítið er at ivast í, at besti og lættasti mátin hjá Saudi-Arabia at sleppa út úr íkomnu kreppuni er at taka valdið frá krúnprinsinum.

Kelda: Pov. International