NÝGGJ BÓK FRÁ FORLAGNUM “LEIRKERINUM” - fimta bókin í røðini
Forlagið “Leirkerið” í Gøtu hevur júst givið út bókina “Maria.” Hon er ein bíbilsk skaldsøga um Mariu, sum er ein av teimum fimm kvinnunum í ættartali Jesusar. Maria var móðir Jesusar. Bókin er skrivað út frá søguni um Mariu, sum vit lesa hana í Nýggja Testamenti.
Á baksíðuni á bókini stendur:
Maria var ein heilt vanlig ung kvinna, tá ið eingilin kom til hennara og boðaði frá, at Gud hevði valt hana til eina serstaka uppgávu: Hon skuldi verða við barn og eiga hin lovaða Messias. Men Maria hevði ongantíð verið saman við nøkrum manni, so hon kundi ómøguliga vera við barn. Antin var talan um svikaráð ella um undurverk.
Amerikanski rithøvundurin, Francine Rivers, hevur skrivað bókina. Francine Rivers er fødd í 1947 og hevur skrivað bøkur í meir enn tríati ár. Frá 1976 til 1985 var hon sera væl umtókt sum rithøvundur og vann rættiliga nógvar heiðurslønir fyri bøkur sínar. Tá ið hon í 1986 gjørdist kristin, skrivaði hon bókina Redeeming Love um trúarfráboðan sína.
Síðan tá hevur Rivers skrivað nógvar bøkur og vunnið stóra viðurkenning í bókaheiminum og millum lesarar. Skaldsøga hennara The Last Sin Eater vann ECPA gullheiðursmerki, og tríggjar bøkur hennara hava vunnið ta mætu heiðurslønina, Romance Writers of America Rita Award.
Francine sigur sjálv, at hon sum rithøvundur roynir at koma nærri Gudi, og at hon við bókaverkum sínum vil lovprísa Jesusi fyri alt, sum hann hevur gjørt og ger í lívi hennara.
Francine hevur skrivað skaldsøgur um tær fimm kvinnurnar í ættartali Jesusar. Tær eru umframt Mariu: Tamar, Rahab, Rutt og Batseba. Allar fimm bøkurnar fáast nú á føroyskum. Tamar kom út í 2013, Rahab í 2014, Rutt í 2015 og Batseba í 2016.
Páll á Lakjuni hevur týtt bøkurnar til føroyskt. Allar fimm bøkurnar eru komnar út á forlagnum ‘Leirkerið’ og eru at fáa í bókabúðunum kring landið.
Kristiliga Tíðindatænastan
v/ Poul Jóhan Djurhuus
gjaranes@gmail.com
Líknandi tíðindi
Mest lisið í farnu viku
Samband
Heygsvegur 8
490 Strendur