Soleiðis hevur Maria skrivað á sínum facebook vanga:

Hetta er Bjørt. Hon er ein av teimum 20 fantastisku ljósmøðrunum, í hvørs hendur, vit dagliga lata lívið hjá mammu og baby. 

Tað var eitt knúst mammuhjarta, sum á føðideildini var vitni til, hvussu nýggjar familjur vóru sendar heim stutt eftir føðing vegna verkfall. Tað píndi meg at síggja, at aðrar mammur ikki fingu somu góðu sømdur, sum vit høvdu fingið. Ljósmøðurnar hjálptu okkum við kærleika og nærleika, ið hevur havt alt at siga í byrjanini av hesum nýggja kapittulinum sum foreldur.

Eg kann ikki ímynda mær, hvussu støðan kundi verið, um eg sum fyrstugangsføðandi hevði verið send heim aftaná fáar tímar. Mín infektión kundi havt vorðin nógv meira álvarsom áðrenn nakað var gjørt við tað, og eg sum ein sárbar nýggj mamma, hevði ongantíð fingið bróstagevingina at rigga. 

Tískil er vert at hugsa gjølla um hetta stóra arbeiðið, sum hesar ljósmøðurnar gera. Tær syrgja fyri tryggleika, meðan vit bera barnið í hesar mongu mánaðnar. Tær syrgja fyri best møguligu føðing og vælkomst hjá barninum - bæði dag og nátt, summar og vetur, gerandisdagar og heilidagar. Síðst men ikki minst, hjálpa og vegleiða tær dagarnar aftaná. Nakað, ið eg aldrin hevði ímynda mær fór at hava so stóran týdning! Nakað, ið ger, at eg og aðrar ikki nýtast at fara til lækna við bruna í bróstunum, føðidepressión ella við einum barni, ið ikki trívist, nevniliga tí at hesar megnar kvinnur hava verið har fyri okkum. 

So hvussu kann nakað arbeiðið hava størri týdning enn hetta? Hvat er dýrabarari enn at syrgja fyri at barnið kemur sunt, frískt og gott til heimin? Gevið tí hesum kvinnum ta løn, ið tær hava uppiborðið. Pengarnar verða spardir í hinum endanum, tí tær hava syrgt fyri eina góðan byrjan. Og hvat er vigtigari enn ein góð byrjan uppá lívið? Einki!

Takk ljósmøður, fyri alt sum tit hava gjørt fyri okkum trimum. Vit vóna, at tit fáa ta virðing frá fíggjarmálaráðnum, sum tit hava uppiborið. 

kelda: https://www.facebook.com