Sambært Reuters er maðurin skotin og dripin í italienska býnum Milano.

Tíðindastovan hevur upplýsingarnar frá trygdarkeldum, men tær eru ikki endaliga váttaðar.

Innanríkisráðharrin í Italia hevur júst boðað til tíðindafund. Hildið verður, at hann har fer at vátta, at yvirgangsmaðurin er skotin og dripin.

Talan er um 24 ára gamla tunesaran Anis Amri. Hann er undir illgruna fyri at hava koyrt ein 40 tons tungan lastbil inn á ein jólamarknaða í Berlin mánakvøldið. Samleikapappír og fingramerki hjá Anis Amri vóru funnin í lastbilinum.

Men næstan samstundis sum boðini um skottilburin í Milano frættust, komu boð frá løgregluni í Aalborg um at man leitar eftir einum manni ið passar til lýsingina av persóninum ið stóð aftanfyri álopið í Berlin. Løgreglan í Norðurjyllandi fekk uml kl. 8, føroyska tíð, eina fráboðan frá einum borgara ið hevði sæð ein mann ið kundi vera eftirlýsti tunesarin, í umráðnum tey rópa “Eternitten”. Tað er eitt øki einar 2 km. sunnanfyri miðbýin í Aalborg. Løgreglan greiðir frá at eitt stórt átak er í gongd í løtuni, og at man vil hava fólk at halda seg burtur frá avbyrgda økinum.

12 fólk lótu lív, og 49 vóru løstaði í álopinum mánakvøldið.