“SEV heldur fast um málið í 2030, men tíverri hava forðingar og seinkingar verið á grønu kósini seinnu árini,” sigur nevndin.

Elfelagið, sum hevur eykaaðalfund í morgin, vísir á, at ov nógvar seinkingar hava verið á grønu kósini seinnu árini, og hesar seinkingarnar stava millum annað frá fyrisitingarligum forðingum.

Óneyðug seinking í Hoyvíkshaga

Nevndin í SEV sigur seg undrast á forðingarnar fyri einum vindorkuútboði í Hoyvíkshaganum, har mest upplagda grøna verkætlanin – ein 18 MW vindmyllulund – kundi verið boðin út, um festarin og ein samstarvsfelagi hansara ikki hindraðu útbjóðingini.

“Festarin og samstarvsfelagin siga seg hava gjørt eina avtalu um nýtslu av haganum til vindorku, og higartil hava teir sett seg ímóti einum almennum vindorkuútboði í Hoyvíkshaganum, hóast elveitingarlógin ásetir, at øll elframleiðsla úr vindorku skal bjóðast út,” sigur nevndin, og hon leggur afturat, at myndugleikarnir hava ilt við at loysa hendan knútin.

“Nevndin kann bara staðfesta, at tað ber til at seinka einari skilagóðari og umhvørvisvinarligari útbygging av elskipanini hjá øllum Føroya fólki – enntá á almennari jørð,” sigur John Zachariassen, nevndarformaður.

Flest allar tøkniligar fortreytir eru longu til staðar – t.d. koplingarstøðin í Húsahaga, elnetið og vindmátingarnar úr Húsahaga, sum kunnu brúkast aftur í Hoyvíkshaga.

SEV sigur, at umleið 30 milliónir krónur kundu verið spardar í oljuútreiðslum árliga við núverandi oljuprísum, um henda útbyggingin varð sett í verk.

Les eisini greinina "Siggert Patursson: Vit hava fleiri ferðir bjóðað SEV til samstarv".