“Um landsstýrið ætlar, at Bústaðir skal framskunda bústaðarbygging fyri 250 mió. krónur, so mugu aðrar almennar íløgur útsetast.” Tað sigur Vinnuhúsið.

Í farnu viku legði landsstýrið fram ein bústaðarpakka við átøkum, sum skulu økja um útboðið av bústøðum í Føroyum, og tað er í tí sambandi, at Vinnuhúsið vísir á, at virksemið í byggivinnuni er metstórt í løtuni, og at omanfyri 400 privatir bústaðir eru í gerð, umframt leigubústaðirnr, sum Bústaðir stendur fyri.

“Um landsstýrið heldur, at enn meira ferð skal setast á bústaðarbyggingina, er hetta eitt politiskt val. Men landsstýrið má so eisini hava dirvi til at siga, hvørjar aðrar almennar verkætlanir skulu niðurraðfestast og útsetast, um man ætlar at økja almennu íløgurnar við 250 mió. krónum,” sigur Vinnuhúsið.

Ikki á fíggjarlógini

Vinnuhúsið ávarar ímóti gongdini, har almennu íløgurnar í alsamt størri mun vera lagdar uttanfyri fíggjarlógina.

“Í 2017 fekk Bústaðir heimild at lánifíggja 250 mió. krónur, og nú verða 250 mió. krónur so lagdar omaná,” sigur Vinnuhúsið.

“Hetta merkir, at fíggjarlógin avspeglar í alsamt minni mun almenna íløguvirksemið, og tí kann landið ikki bara hyggja eftir formliga íløgukarminum á fíggjarlógini, tá búskaparstýringin verður løgd til rættis,” siga tey.

Eru í hákonunkturi

Vinnuhúsið minnir á, at vit eru á toppinum í einum hákonjunkturi, og tað almenna má tillaga sína búskaparstýring og almenna íløgupolitikk eftir hesum.

“Tað er sera umráðandi, at landsstýrið ikki loypir á leistum, men brúkar neyðugu tíðina til at fyrireika tað, ið ætlanin er at gera. Um neyðugu fyrireikingarnar ikki verða gjørdar, er stórur vandi fyri, at vit um nøkur ár standa við byggiverkætlanum, sum eingin er nøgdur við. Vit mugu hava tað tol, ið skal til, fyri at fáa varandi nyttu burturúr teimum íløgum, sum verða gjørdar í hesum árum,” sigur Vinnuhúsið.

Landsstýrið æltar, at 200 almennar íbúðir skulu verða bygdar tey næstu árini afturat teimum, sum longu eru í gerð.