Uppskotið um at broyta rúsdrekkalógina fall
Ivasamt hvat hetta merkir fyri avtaluna um fíggjarlógina.
Rúsdrekkasøla Landsins verður framvegis einasta staðið í landinum, har loyvt er at selja drykkir, ið hava meira enn 5,8 rúmprosent av alkoholi í.
Uppskotið hjá Magan Laksáfoss, løgtingsmanni, um at geva bryggjaríunum loyvi at selja sterkt øl og cider í teirra egnu sølubúðum fall, tá atkvøtt varð um tað við 3. viðgerð í løgtinginum í dag.
Upprunaliga skeyt Magni Laksáfoss upp, at bryggjaríini skuldu sleppa at selja alt tað, sum tey hava loyvi at bryggja. Tað merkir, at bryggjaríini skuldu eisini hava loyvi at selja rúsdrekka uppí 60 prosent av alkoholi. Men vinnunevndin broytti hetta til bert at umfata sterkt øl og cider, og soleiðis varð uppskotið samtykt við 2. viðgerð. Tá vóru 12 atkvøður fyri og 9 ímóti.
Sostatt skuldi tað bara verið ein avgreiðsluspurningur at fingið málið samtykt við 3. viðgerð, men soleiðis skuldi tað tó ikki ganga. Í dag var tingið betur manna, og eftir øllum at døma vóru tað fleir nei-atkvøður enn ja-atkvøður, sum vóru komnar afturat.
Spurningurin nú er, hvørjar avleiðingar hetta fær fyri samgonguna. Samgonguleiðararnir hava gjørt avtalu við Magna Laksáfoss um, at hann skal atkvøða fyri fíggjarlógini, og afturfyri skuldi samgongan atkvøða fyri hansara uppskoti um at broyta rúsdrekkalógina og eisini skuldu pengar játtast til skótadepilin á Selatrað.
Við at fella uppskotið um at broyta rúsdrekkalógina, er tann avtalan brotin.
Mest lisið í farnu viku
Samband
Heygsvegur 8
490 Strendur