Hvør eigur bøin við Gjógv?

Nú ber til at fáa at vita, hvør eigur hvørt einstakt av teimum meira enn 2.000 stykkjunum, sum hoyra til bygdina.

Asfinn Sigvardsen, fyrrverandi lærari hevur skrásett øll bøstykkini og allir lutir innangarðs, og hesar upplýsingarnar eru nú tøkar fyri almenninginum á alnetinum.

Í annaðkvøld klokkan 19:00 verður skipað fyri almennari móttøku í Bygdarhúsinum við Gjógv í sambandi við, at Asfinn Sigvardsen letur úr hondum stóra arbeiðið, hann hevur gjørt.

Tilfarið er savnað saman í fleiri áratíggju. Asfinn hevur tosað við eigararnar og soleiðis savnað saman allar upplýsingarnar, skrásett eigarar, skrivað frágreiðingar og tikið myndir. Sethúsini og allir bygningar annars eru eisini við.

“Gjógv er ognarbygd burturav, og hevur hetta ført tað við sær, at við arvaskifti er bøurin lutaður sundur í smærri og smærri stykki, soleiðis at í 1986 var talið komið heilt upp á 2056 bøstykki (lutir),” skrivar Sunda kommuna, á síni heimasíðu.

Stuðlar til verkætlanina hava verið Sunda kommuna, tann gamla Gjáar kommuna, Bakkafrost og Betri.

Móttøkan við Gjógv í annaðkvøld er almenn, og eftir móttøkuna verður okkurt leskiligt at fáa á Gjáargarði.

Soleiðis skrivaðu vit á R7.fo í Apríl.