Mikukvøldið 23. januar klokkan 19 fer Rigmor Dam, landsstýriskvinna við mentamálum, at handa virðislønirnar til lista- og mentafólk fyri 2018. Í ár verður handanin á almennari samkomu í Mentanarhúsinum í Fuglafirði.

Virðislønirnar eru tríggjar í tali:

Mentanarvirðisløn Landsins, sum er 150.000 krónur, er ein heiður til føroyskt mentafólk, sum tøkk fyri útint listarligt avrik.

Heiðursgáva Landsins, sum er 75.000 krónur, verður latin fyri at hava virkað til frama fyri mentanarlig virði, sum hava týdning fyri føroyska mentan, list og mentanararv.

Virðisløn til ungt listafólk, sum er 50.000 krónur, verður latin ungum listafólki, sum hevur víst serliga góð evni og sum hevur gjørt vart við seg á síni listabreyt. Henda virðislønin verður latin fyri at eggja til framhaldandi virksemi og menning.

Í fjør fekk Barbara í Gongini mentanarvirðisløn landsins, Frits Johannesen fekk heiðursgávu landsins og Konni Kass fekk virðisløn til ungt listafólk.

Sum siðvenja er, verða nøvnini á teimum sum fáa mentanarvirðislønirnar ikki kunngjørd, fyrr enn tá virðislønirnar verða handaðar.