Stjórnin í Dublin verður heimsins fyrsta, ið flytur allar sínar íløgur úr olju-, gass-, kol-, og torvfyritøkum. Uppskotið fekk atkvøður úr øllum flokkum.

Irish Times skrivaði fyrr í vikuni, at Dáil (undirhúsið) samtykti lógina, ið fer í senatið (“yvirhúsið”) til viðgerðar fyri at fáa gildi. Irish Times sigur, at írar eru leiddir av at verða spottaðir í ES fyri at vera eftirbátur í at fylgja París-avtaluni, ið áleggur londunum, ið hava skrivað undir hana, at minka CO2 útlátið.

Írar eru seinastir í Evropa at brenna torv heima. Torvídnaðurin hevur til nýliga verið stórvinna á grønu oynni, sum í síðstuni hevur brent meiri olju og gass.

Írsku torveyguni eru fleiri manshæddir djúp, verða skorin við risa maskinum, og merkja landslagið so langt eygað røkkur í summum pørtum av Írlandi.

Í evropiskum oyrum ljóðar torv til heimabrenni sum miðøld. Tað er tað eisini.

Tað er kanska, tí torvið sum álit hjá so mongum írskum húsarhaldum verður so seint skift út við kol, olju og gass, at írsku húsarhaldini koyra 60% hægri CO2 útlát í luftini enn miðal húsarhald í ES, skrivar Irish Times.

Almenni írski íløgugrunnurin eigur 9 mia evrur (= 60 mia kr) í partabrøvum, og av hesum eru 300 mió evrur (= 2,3 mia kr) sett í kolvetnisídnað ymsastaðni. Tað eru hesi partabrøv, ið nú verða seld, um senatið í Dublin atkvøður fyri.

Lógin ásetir tó, at partabrøvini skulu seljast so skjótt, sum tað ber praktiskt til.

Írskir miðlar skriva, at henda anti-kolvetnis- og CO2 árásin er stórsigur fyri tað umfatandi rørsluna í Vestanlondum, ið arbeiðir ímóti kolvetni sum orkukeldu. Rusland fíggjar eisini hesa rørslu, tí russisk olja og gass kappast móti USA.

Henda rørsla vil erstatta kolvetni sum orkukeldu, ið enn framleiðir 85% av allari orku í Vestanlondum, men hevur einki mótboð til olju uttan 10.000-tals vindmylnur og 10.000-tals fótbóltsvøllir av sólkjarnupanelum í øllum londum, ið onga veitingartrygd geva og krevja tilsvarandi back-up við kolvetnisverkum.

Henda rørsla er tætt tengd at klimafascismuni, ið telur fleiri miljónir fólk og fær 10.000 mia (= 10 billiónir) kr um árið í skattapengum til gransking, studning og framleiðslu til vind, sól o.t. ístaðin fyri kolvetni, ið næst eftir kjarnorku er heimsins bíligasta, tryggasta og reinasta og nú aftur ótømandi orkukelda.