Ikki øll ríða sama dag, sum tey saðla. Tað gera kongolesar ikki, tá um forsetaval ræður. Øll bíða enn spent eftir valúrslitinum fyri 22 døgum síðan.

Mangur spyr helst, hví nakar kann vera áhugaður í einum forsetavali í DRC, ið hvørki er demokrati ella lýðveldi, men eitt korruptur politiskur frumskógur.

Tað kann hava týdning, hvør verður forseti í Congo, tí landið hevur fleiri av heimsins “rárum” málmsløgum, ið kosta ótald mannalív hvønn dag.

Congo er eitt av heimsins stóru londum, 2,4 mió km2 til víddar (størri enn alt ES, við 70 mió íbúgvum, men miðal ársinntøka er bert $500 pr. íbúgva (3.500 kr), altso 10 kr um dagin hjá teimum fáu, ið hava lønt arbeiði og inntøku.

Farandi(?) forseti, Joseph Kabila arvaði ríkið frá pápa sínum fyri nøkrum árum síðan. Kabila er ein av heimsins ríkastu monnum, ein blóðdálkaður lúshundur. Sostatt er Congo eitt av heimsins “shitholes” at búgva, sum onkur hevði sagt.

Tað fyrsta, føroyingar kendu til Congo, var tað ein belgisk revsikoloni, privat ogn hjá Leopold II kongi í Belgia, til belgiska stjórnin tók tað frá honum. Ein av teimum, ið byrjaði uppreistur móti Leopold, var trúboðari úr Havn, “Dollin”.

Føroyingar hoyrdu nógv um Congo um 1960, tá Niels Juel Arge við darrandi rødd dagliga las tíðindi um Patrice Lumumba og Moise Tsombe, ið bardust blóðiga um valdið. Heldur ikki aftan á teir báðar hevur nakað fantilsi verið á.

Seinasta borgarakríggj var 1996-2003, tá einar 5 mió fólk lótu lív av sjúku, svølti og deyða. Eftir 2016 fekk Congo nýggja grundlóg, ið kravdi, at Joseph Kabila skuldi leggja frá sær, og nýval vera sama ár. Men einki nýval varð.

Kabila hevur sitið til 2018, tá hann aftur lovaði, at forsetaval skuldi haldast. Hesuferð eydnaðist, men einki er at frætta frá úrslitinum av valinum 30. des.

2 andstøðuvalevni vóru, Tshisekedi og Fayulu. Skutilsveinurin hjá Kabila eitur Shadary. Tað ljóðar, at Tshisekedi vann, og Shadary fekk fæst atkvøður.

Valeftirlitið telur 16.000 afrikanskar hermenn. Katólska kirkjan hevði 40.000 sivilar valeygleiðarar, og ein annar felagskapur 15.000 eftirlitismenn.

Afrika er so korrupt, og “vinnur” valevnið hjá Kabila, verður tað “svarta” morð.