Leita framvegis eftir burturfluttu norsku kvinnuni

Enn verður leita eftir burturfluttu norsku kvinnuni Anne-Elisabeth Hagen, og í dag fara froskmenn at leita í einum vatni tætt við húsini, har kvinnan býr í Lørenskog. Sagt verður, at tað er ikki Anne-Elisabeth Hagen sjálvari, ið leitað verður eftir, men eftir sporum ið kunnu tengjast at málinum.

Val verður í Tailandi

Tailendski kongurin hevur lýst eina kongaliga fyriskipan, sum góðtekur, at fyrsta valið verður hildið í landinum síðani kvettið í 2014. Valdagurin er enn ikki lýstur, skrivar NTB.

USA og Taliban samráðast um frið

USA váttaði í gjár, at ein amerikansk sendinevnd eru í Qatar, har tingingar eru við Taliban, í eini roynd at gera eina friðaravtalu fyri Afghanistan. Hetta verður gjøjørt hóast Taliban nýliga hevur lopið á amerikansk hernaðarlig mál í landinum.

FBI hevur ongar pengar til njósnarar

Amerikanska fregnartænastan FBI sigur, at orsaka av at stórur partur av almennu fyrisitingini er stongd, nú eingin játtan er til lønir, hevur FBI mist nógvar loyniligar keldur, tí eingir pengar eru at rinda teimum løn við.

FBI segði longu fyri tveimum vikum síðani, at støðan fór at fáa avleiðingar fyri arbeiðið hjá njósnarunum, men í gjár var boðskapurin ítøkiligari, sigur millum annað CNN.

Seks mánaðar gamalt barn horvið og funnið aftur í Svøríki

Ein 39 ára gomul kvinna er undir illgruna fyri at hava roynt at burturflutt eitt seks mánaðar gamalt barn uttanfyri ein barnagar í svenska býnum Göteborg í gjár.

Í tveir tímar varð leitað við tyrlu og hundum eftir barninum.

Mamman at barninum fór inn í barnagarðin eftir einum øðrum barni og lat vognin standa uttanfyri í einar 5 til 10 minuttir. Tá hon kom útaftur, vóru bæði vognur og barn horvin.

Tveir tímar seinni varð barnið funnið aftur á einum parkeringsplássi uttanfyri ein handil umleið seks kilometrar frá barnagarðinum.  Barnið hevði tað gott.

Kunnu nokta transpersónum at gera hernaðartænastu

Hægsti rættur í USA hevur góðkent, at Trump-fyrisitingin kann nokta transpersónum (t. e. fólki, sum siga seg vera eitt annað kyn, enn tey veruliga eru), at gera hernaðartænastu, meðan málið verður viðgjørt í rættarskipanini. Tað skrivar NTB.

Handilssamráðingar millum USA og Kina avlýstar

Ætlaðu handilssamráðingarnar sum skuldu verða millum USA og Kina í næstu viku eru nú avlýstar. Tað upplýstu keldur fyri CNBC og Financial Times í gjár.

Ætlanin var, at tveir kinesiskir vararáðharrar skuldu koma til Washington í næstu viku, fyri at halda fram við samráðingunum millum londini. Men hesar samráðingarnar eru nú eftir øllum at døma avlýstar. Orsøkin skal vera, at partarnir hava ikki gjørt serlig framstig í spurninginum, sum USA hevur kallað “fleiri áratíggju við statsstuðlaðum stuldri av amerikanskum andsverki og tøkni.”

Amerikanski forsetin, Donald Trump og kinesiski forsetin Xi Jinping gjørdu semju á G20-toppfundinum í Argentina í desember, um ein “handilsvápnahvíld” til 1 mars í ár. Men nú røkist einki fyri, at nøkur endalig semja verður gjørd áðrenn tann freistin gongur út.