Føroyar missa MSC góðkenningina av makreli 2 mars 2019
MSC boðar í dag frá, at MSC góðkenningin av makreli verður tikin aftur 2 mars í ár. Orsøkin er at veiðan er munandi hægri enn tilráðingin frá ICES og at stovnurin er minkandi
Marine Stewardship Council, stytt MSC, sum blástemplar fiskiveiðu sum burðardygga, hevur í dag boða frá, at MSC góðkenningin av makreli verður tikin aftur 2 mars.
MSC sigur at orsøkin til at tey gera hetta er, at tilgongdin til makrelstovnin er vánalig og at strandalondini í norðuratlantshavi veiða munandi meira makrel enn tilráðingin hjá ICES sigur. ICES tilráðingin var 316.000 tons, sum var ein niðurskurður á 68% fyri at tryggja at stovnstøddin var burðardygg. Londini valdu ikki at lurta eftir ICES og hava í staðin ásett sær munandi hægri kvotu enn ICES tilmælir.
Tá tilgongdin so eisini er vánalig, so sær MSC seg noytt til at taka MSC góðkenningina aftur. Stovnurin er nú mettur til 2,79 mió. tons og er undir burðardygga markinum. Lurtaðu vit eftir ICES, so metti ICES at stovnurin aftur var burðardyggur í 2020-21
Tað er trupult at selja makrel til stórar handilsketur uttan góðkenning. Tí kann tað gerast ein trupulleiki. Men av tí at ásettu kvoturnar eru minkandi vænta onkrir fiskaseljarar at avleiðingin ikki verður so stór. Men tað er tó ein vandi í at stórar handilsketur kunnu velja at taka makrelin av hillunum.
Av tí at hini strandalondini eisini missa sína MSC góðkenning, so verður mett at avleiðingin kanska ikki verður so stór. Onkur heldur, at nú noyðast strandalondini at seta seg saman aftur og minka kvoturnar í hesum ári, fyri at sleppa undan at kundarnir taka vøruna av hyllini.
Enn er alt so óvist, tí hetta avgerðin er tikin í dag og trupult er at fáa viðmerkingar. Vit rokna við at vita meira í tíðindunum á middegi í morgin.
Vit rokna eisini við at fáa politiskar viðmerkingar, tí at missa góðkenning tí veiðan ikki er burðardygg kemur ikki væl við hjá øllum í politisku skipanini.
Mest lisið í farnu viku
Samband
Heygsvegur 8
490 Strendur