Leygardagin tann 16. februar verður Búnaðarstevnan fyriskipað á fimmta sinni á Skúlatrøð í Klaksvík. Búnaðarstevnan er ein stevna, sum setur fokus á viðkomandi viðurskiftir innan landbúnaðarøki í Føroyum.

Millum evnini sum verða viðgjørd er politiska ætlanin hjá landsstýrismanninum í búnaðarmálum um at vit innan alt ov langa tíð í størst møguligan mun, kunnu gerast sjálvveitandi av stráfóðri og øðrum landbúnaðarvørum, ið vit til dagligt innflyta úr okkara grannalondum.

Eisini spurningurin um ferðavinnuna og gongd í haga, verður viðgjørdur. Hetta er eitt evni, sum hevur kveikt nógvar neistar til kjak og tað eru ymiskar meiningar um, hvussu hetta skal skipast framyvir.

“Búnaðarstevnan hevur verið hampuliga væl vitjað og neyðugt er at skráseta seg sum luttakara, tí luttøkuplássið er avmarkað,” siga fyrifeikararnir.

Stevnan endar við borðhaldi.