Føroysk ítróttarfólk sleppa at luttaka undir føroyskum flaggi
ÍSF kallar hetta fyri risa frambrot fyri Føroyskan ítrótt.
Føroysk ítróttarfólk sleppa at luttaka undir føroyskum flaggi í teimum kappingum, sum Europeiska Olympiska Nevndin (EOC) skipar fyri, og har sum Føroyar hava altjóða limaskap. Tað stendur í einum skrivi frá EOC, sum ÍSF hevur móttikið.
Talan er um European Games og European Youth Olympic Festival. Harafturat er
ÍSF bjóðað við, sum eygleiðari til Games of Small States of Europe í ár.
European Games er fjórða hvørt ár, við umleið 6.000 íðkarum. Í ár verður kappingin
21. til 30. juni í Minsk í Hvítaruslandi. Føroysku ítróttagreinirnar, sum kunnu luttaka
hesuferð eru: bogaskjóting, badminton, judo og borðtennis.
European Youth Olympic Festival er annað hvørt ár, og er fyri ungar íðkarar 14-18
ár. Talið av íðkarum er umleið 3.600. Í ár verður kappingin í Baku í Aserbadjan tann 21.
til 27. juli. Føroysku ítróttagreinarnar, sum kunnu luttaka hesuferð eru: hondbóltur,
judo, svimjing og flogbóltur.
Games of Small States of Europe er annað hvørt ár, og er fyri lond við færri enn
einari mllión fólkum. Umleið 1.000 íðkarar eru partur av hesari kapping. ÍSF er
bjóðað við sum eygleiðari til leikirnar í 2019, sum verða í Montenego 27. mai til 1.
juni.
“Tað er okkara vón, at Føroyar sleppa at luttaka í leikunum í 2021,” sigur ÍSF í einum tíðindaskrivi.
Limalondini í Games of Small States of Europe eru: Monaco, Cyprus, Andorra,
Malta, Luxemburg, Ísland, Liechtenstein, San Marino og Montenegro.
Elin Heðinsdóttir Joensen, forseti í ÍSF sigur, at hetta er eitt risa frambrot í strembanini, at vinna okkum altjóða viðurkenning innan ítrótt, herundir limaskap í IOC (Altjóða Olympisku Nevndini).
”Avgerðin gevur okkum mót til at halda fram við arbeiðinum, at tryggja øllum okkara ítróttagreinum altjóða viðurkenning og harvið møguleikan, at kappast støðugt í altjóða kappingum.”
Mest lisið í farnu viku
Samband
Heygsvegur 8
490 Strendur