Tá Rigmor Dam legði frá sær sum landsstýriskvinna í Mentamálaráðnum, kravdi Framsókn at fáa tann sessin. Í Dimmalætting, sum kom út um vikuskiftið endurtók Poul Michelsen, formaður í Framsókn, at landsstýrissessurin er upplagdur, nú flokkurin hevur mist formannin í fíggjarnevndini.

R7 skilir, at Framsókn ikki fæst at ganga frá kravinum um landsstýrissessin. Samstundis ger Tjóðveldi eisini krav upp á sessin í Mentamálaráðnum. Flokkurin vísir á, at eftir at Javnaðarflokkurin koyrdi Kristin Michelsen úr tingbólkinum, so hevur Tjóðveldi fleiri tinglimir enn Javnaðarflokkurin.

Løgmaður hevur tí verið noyddur at finna ein millumloysn. R7 skilir, at samráðingarnar millum flokkarnar seinastu dagarnar hava loyst gordiska knútin: Løgmaður hevur reiggjað svørðið og klovið Mentamálaráðið í tvey – eitt mentamálaráð og eitt skúlamálaráð.

Eru hesi óváttaðu tíðindi samsvarandi veruleikanum, so liggur nær at gita – og tað loyva vit okkum at gera – at Hanna Jensen úr Framsókn fer at sita fyri skúlamálum og Óluva Klettskarð úr Tjóðveldi fyri mentamálum.

Óluva Klettskarð var landsstýriskvinna í mentamálum frá 30. august til 15. sept. í 2008, tá ið Tjóðveldi tók seg úr samgonguni.