Feløgini sum eiga verksmiðjutrolararnar í Barentshavinum hava í dag sent Fiskimálaráðnum hoyringsskriv viðvíkjandi uppskotinum um kunngerð um at bjóða út rættindi á uppboðssølu í 2019.

Feløgini P/F Enniberg, P/F Akraberg FD 10 og P/F J.F.K. Trol gera greitt, at tey taka als ikki undir við, at partur av kvotuni verður boðin út á uppboðssølu.

“Núverandi kvota er ikki nógv meira enn miðalkvotan, sum hevur verið seinasta 41 árini, og tí meta vit ikki, at tað er rætt, at luta part av kvotuni til uppboðssølu,” siga tey trý feløgini í hoyringssvarinum. Feløgini undrast eisini á, at treytirnar í uppboðssøluni eru broyttar.

Fyrr hevur tað verið soleiðis, at tilboðið sum hevði lægsta eindarprísin av teimum tilboðum, sum komu upp í part, ásetti eindarprísin, sum øll skuldu rinda. Grundgevingin hjá Fiskimálaráðnum fyri hesum var, at á henda hátt rindaðu øll sama prís - marknaðarprísin - fyri somu vøru. Samstundis var tað galdandi, at keyparar, ið bjóðaðu marknaðarprísin ella hægri høvdu vunnið uppboðssøluna.

Men nú skal tann sum bjóðar rinda ásetta boðið, og tað siga feløgini vera tað tey kalla “eina vesentliga broyting í mun til undanfarna ár”.

“Vit vilja tí staðiliga mæla til, at somu uppboðssølutreytir verða galdandi fyri afturlatnu uppboðssøluna sum undanfarin ár. Vit skulu tó ikki dylja fyri, at best hevði verið, um nevnda uppboðssøla varð avtikin, men við tað, at Føroya Løgting hevur samtykt, at uppboðssøla skal vera, so mugu vit sjálvandi fyrihalda okkum til hetta,” siga tey trý feløgini, og tey leggja afturat:

“Men tað má ikki vera soleiðis, at landsstýrismaðurin í fiskivinnumálum á hvørjum ári skal gera
broytingar sum honum lystir.”