Nógv spennandi arbeiðið er í gongd kring leikvøllin við Djúpumýru.

Málið er at okkara leikvøllur skal blíva góðkendur til at spæla altjóða dystir við Djúpumýru. Fyri at tað kann gerast veruleiki, eru tað nøkur krøv vit skulu lúka og tað krevur broytingar.

Trygdargeirin skal víðkast
Fyri at lúka altjóða krøv skal trygdargeirin uttanfyri síðulinjurnar við leikvøllin víðkast soleiðis at tað eru 5 metrar inn á sjálva síðulinjuna. Hettar arbeiðið er í gongd og verður tað planerað so tað er forsvarligt at spæla dyst til fyrsta umfar 10. mars. Arbeiðið at gera alt liðugt kemur tó at takað longri tíð.

Nýggjar ljósmastrar
Eftir ætlan skulu nýggju ljósini lýsa seint í apríl í ár. Vegadeildin hjá Klaksvíkar Kommunu stendur fyri jørðarbeiðinum, og hevur gjørt avtalu við byggifelagið Kanjon um at stoypa betongfundamentini til ljósmastrarnar. Jarnbindingin verður eisini gjørd í hesum døgum.

Nýtt graslíki
Graslíkis teppið skal skiftast í summarstøðginum. Sjálvur leikvøllurin verður somu stødd sum nú er, sum eisini stendur til minstu FIFA-krøvini fyri altjóða dystir.
Veitarin Polytan kemur á vitjan nú í februar at kunna seg um uppgávuna.

Sprinklarar á vøllinum
Í samband við arbeiðið kring leikvøllin er avgjørt at leggja leiðingar til sprinkling av leikvøllinum nú beinanvegin. Dysur og skipanin annars verður eftir ætlan gjørd seinni í ár ella í 2020.

Bláaskýlið
Arbeiði við Bláaskýlinum sum Norðhús stendur fyri er eisini væl áleiðis. Eftir ætlan skal ráðhúsarbeiðið til Bláaskýlið standa liðugt í heyst og tá er tekjan yvir bygninginum og setur til áskoðarar monterað. Annað byggistig byrjar í 2020. Hetta umfatar liðugtgerð av skiftirúmum og øðrum hølum sum krevjast til avvikling av altjóða dystum. Í erva verður felagshøli til áskoðarar.

Tá alt hettar arbeiðið er liðugt, kunnu vit gleðast um at hava fingið ein flottan leikvøll sum lúkur øll altjóða krøv. Umframt at nýggi venjingavøllurin við rennibreyt eisini verður klárur, og kemur at geva okkum nógv betri umstøður at venja.   

kelda: ki.fo