Størsta rættarmál í Noreg av sínum slag fer fram í hesum døgum móti einum 26 ára gomlum “Henrik”, ið hevur sitið í varðhaldi í Lillestrøm síðan í heyst.

Rættarmálið ímóti barnamisnýtaranum byrjaði í Nedre Romerrike Fylkesret og umfatar einar 300 dreingir, ið hava verið offur hjá  hesum Henriki ið verður sagdur at vera fótbóltsvenjari, smbr Dagbladet og #Norway Today.

Tað byrjaði á netinum, tá “Henrik” fekk samband við smádreingir í Noreg, Svøríki og Danmark. Hann segði seg vera gentu og yvirtalaði teir til at senda sær myndir. Teir flestu lótu seg tøla og vístu seg naknar á myndum.

Tá byrjaði “Henrik” næsta leik, nevniliga at blackmaila síni offur, yngsti 9 ár, og hótti við at seta myndirnar út á Facebook, um teir ikki sendu sær fleiri og meiri nærgangandi myndir. Flestu so gjørdu og vassaðu longur út í blotan.

Onkur foreldur søgdu løgregluni frá, so “Henrik” kom í varðhald í 2016, men hann slapp leysur aftur, tí tíðin rann frá politinum, ið ikki hevði nóg góð prógv.

Men næsta árás hjá løgregluni gav 16.000 videoupptøkur av dreingjunum á telduni hjá Henrik, sum eisini hevði yvirtalað fleiri dreingir at hitta seg privat. Av tí stóðst, at ákærur móti misnýtarum eisini galda neyðtøku.

9 sakførarar umboða offrini, ið ikki øll hava hug at traðka fram, tí at Lillestrøm er lítið, og fólk kenna hvønn annan. Nøkur foreldur vilja sleppa synunum, fleiri eru eldri nú, undan skomm av at verða alment umtalaðir fyri hesa sorgarsøgu.

Ein almennur ákærari sigur við Dagbladet, at rættarmálið er langt uttan fyri tað vanliga av sínum slag í norskari rættarsøgu.