“Tað at lønirnar hjá landsstýrisfólkunum vórðu broyttar, hevur spart landskassanum nógvar pengar, og tað er rætt at gera tað sama fyri løgtingsfólk.” Tað segði Kári P. Højgaard, sum á tingfundinum í gjár var framsøgumaður fyri Sjálvstýri í málinum um lønirnar hjá løgtingsfólkum.

“Tað eru veikleikar í hesum uppskotinum, og ein tann størsti veikleikin er, at tað verður staðfest, at løgtingsarbeiðið er eitt hálvtíðarstarv. Tað er óheppið, tí løgtingsarbeiðið eigur at vera eitt fulltíðarstarv,” segði hann.

Eisini nevndi Kári P. Højgaard arbeiðsviðurskiftini hjá varafólkum sum ganga inn og út úr løgtinginum. Hann helt at hesi eru sera illa vard, og hann fegnaðist um at hetta nú verður broytt.

“Tað er komið fyri, at onkur varamaður er blivin arbeiðsleysur, meðan hann var staddur uttanlands í arbeiðsørindum,” segði Kári P. Højgaard. Hann segði, at hann kundi hugsað sær at sæð eina uppgerð sum vísti, hvat uppskotið hjá løgtingsformanninum kostar, tí í miðlunum verður tosað um lønarhækkan, men í veruleikanum er talan um eina sparing.