Nettotilflytingin er methøg
Tórshavnarøkið og Eysturoy eiga 60% av fólkatalinum og 80% av fólkavøkstrinum.
Fólkatalið í Føroyum var tann 1. februar í ár 51.440. Tað eru 844 fólkum fleiri enn tað vóru 12 mánaðir frammanundan. Vøksturin var 1,7%. Tað skrivar Hagstovan í dag.
Burðaravlopið var 291 og nettotilflyting var 553.
Samanborið við undanfarna 12-mánaðarskeiðið er burðaravlopið vaksið við 93, og nettotilflytingin er vaksin við 21. Samlaði fólkavøksturin er sostatt vaksin við 114.
Størsti fólkavøksturin er í Tórshavnarøkinum, har fólkatalið vaks við 445 fólkum og í Eysturoy vaks fólkatalið við 237 fólkum. Í Sandoy, Suðuroy og fleiri útoyggjum minkaði fólkatalið.
Býtið millum økini
Í Tórshavnarøkinum búgva 19.793 fólk, sum er stívliga 38% av fólkatalinum í Føroyum. Men vøksturin hetta 12-mánaðarskeiðið svarar til 53% av øllum fólkavøkstrinum.
Í Eysturoy búgva 11.555 fólk, sum er stívliga 22% av fólkatalinum. Men vøksturin í Eysturoy var 28% av fólkavøkstrinum fyri alt landið.
Í Norðoyggjum búgva 12% av fólkatalinum í Føroyum, og vøksturin var 8% av øllum fólkavøkstrinum.
Í Streymoyar sýslu uttan høvuðsstaðin búgva 9% av fólkatalinum, og vøksturin var 7% av samlaða vøkstrinum fyri alt landið.
Bæði í Sandoyar og Suðuroyar sýslum er ein minking í fólkatalinum sum svarar til ávikast 0,6 og 0,4% prosent.
Mest lisið í farnu viku
Samband
Heygsvegur 8
490 Strendur