Sjógvurin rundanum Føroyar er feskari enn nakrantíð fyrr er mált
Saltinnihaldið er aftur metlágt, sigur Havstovan.
Nýggjasta uppgerðin av saltmátingum vísa, at sjógvurin á føroyska landgrunninum og útiá framvegis er lutfalsliga feskur, og í heyst og vetur vístu mátingarnar metlágt saltinnihald á Landgrunninum. Tað skrivar Havstovan í dag.
Havstovan mátar saltinnihaldið á Landgrunninum við Lívfiskastøðina í Skopun, og í 2017 var saltinnihaldið metlágt alt árið sammett við undanfarnar mátingar, ið eru gjørdar síðan 1995.
Teir fyrstu mánaðirnar í 2018 var saltinnihaldið eitt vet hægri enn somu mánaðir í 2017, men í heyst lækkaði tað aftur, og metlágt saltinnihald varð mátað í september, november og desember 2018, eins og í januar 2019.
Havstovan mátar eisini hita og salt á opnum havi 3 - 4 ferðir um árið. Her vísa mátingarnar fyri 2018, at saltinnihaldið í atlantsjógvi hevur hildið sær áleið á sama lága virði, sum í 2017. Hinvegin er hitin lækkaður eitt vet, men sjógvurin er framvegis væl heitari enn miðskeiðis í 90-árunum.
Hesi hita og salttøl verða m.a. send til ICES, har tey seinni verða við í eini árligari frágreiðing.
Mest lisið í farnu viku
Samband
Heygsvegur 8
490 Strendur