Barnarættindi hjá føroyskum børnum eru hótt tá foreldur hava sálarligar trupulleikar ella rúsevnismisnýtslu. Tað er niðurstøðan eftir Barnarættindadagarnar 2019, sum Norðurlandahúsið skipaði fyri í vikuni.

Rák var við, saman við øllum 7. flokkum í landinum. Í sendingini hoyra vit brot úr ymiskum uppleggum og tosa við upplegshaldarar. 

Laura Katrine Apol, hevur skrivað bók um, at vaksa upp hjá sálarliga sjúkari mammu. Hon tosar m.a. um sína lagnu og um týdningin, at raðfesta børnini fremst tá myndugleikar fáa avgerðarrætt í lívinum hjá børnum. 

Sálarfrøðingurin Lív Justinussen, frá Bláa Krossi Føroya, sigur, at minst 1200 føroysk børn liva í einum heimi við rúsevnismisnýtslu. Hon tosar m.a. um tær avbjóðingar hesi børn hava. 

Familjufyrisitingin var har og tosaði um rættindini hjá børnum, tá foreldur verða skild og familjufyrisitingin skal áseta samveruna børnini skulu hava við foreldrini. Vit tosa við Barbaru Jacobsen, sosiologur, og Kari Hattarstein, juristur. Tær eru báðar málsviðgerðar, og sita við avgerðarrættinum um samveru. Vit hoyra m.a. at Familjufyrisitingin ikki kannar foreldur fyri sálarligar trupulleikar ella rúsevnismisnýstlu, men tey kunnu heinta upplýsingar frá øðrum myndugleikum. 

Skemt frá Gundur Johannesen var eisini á skrá. Vit hoyra um hansara karakter Jákup, sum er ein 13 ára gamal drongur, ið ongan góðan eigur.

Harumframt fáa vit orðið á fyriskiparan Alice Simonsen, og á lærararnar Duritu Jacobsen og Rebekku Niclasdóttir. 

Annika Bolton Mortensen leggur sendingin til rættis.