Sambært grein í The Times, so er Drotningin ónøgd eftir at May noktaði at greiða henni frá hvørja ætlan bretska stjórnin hevur í Brexit-málinum. Hendingin fór fram tá Theresa May vitjaði Balmoral slottið her fyri.

Forsætisráðharrin búði á Balmoral í nakrar dagar fyrr i ár, og tað sigst at tað var tá at hon fornermaði tey kongaligu.

The Times sigur, at Drotningin og hertogin av Edinburg gleddu seg til vitjanina. Tað hevur longi verið siður at sitandi forsætisráðharrin, einaferð um árið, vitjar drotningina á Balmoral slottinum í Skotlandi. Vitjanin varðar vanliga í nakrar dagar, og er eitt høvið hjá drotningini og forsætisráðharranum at práta undir meira privatum umstøðum.

May og stjórn hennara hava verið fyri nógvum atfinningum síðani hon kom til valdið í juli í ár. Higartil hevur hon ikki avdúka nakað úr ætlan hennara fyri hvussu Bretland skal taka seg úr ES. Hetta hóaðst at funnist hevur verið at hennara loynsemi.

Bretland atkvøddi í juni fyri at taka seg úr Europeiska Samveldinum. Úrslitið av tí fólkaatkvøðuni var, at táverandi forsætisráðharrin David Cameron legði frá sær.

Eftir at søgan um tað ónøgdu drotningina stóð í The Times, viðmerkti kongahúsið, at talan var um eina íspunna søgu.  Eins og danska drotningin, so hevur enska drotningin ongan politiskan leikut, og skal ikki leggja seg út í politisk viðurskifti.

Brexit er ikki einasta málið har Theresa May sigist at hava fingið ilt í drotningina. Í november skrivaði netmiðilin Royal Central, at May umhugsaði strika tey so-nevndu “Royal Charters” til bretsku universitetini. “Royal Charters” er fígging ið enska krúnan letur til gansking á bretsku universitetunum. Talan er um einar 3 milliardir pund árliga. Hildi verður at ætlanin hjá May fer at avmarka møguleikan hjá bretskum granskarum at granska í tí teir vilja, tí at framyvir skulu granskingarverkætlanir góðkennast av politisku mynduleiknum.

Bretskir eygleiðarir siga at tað er sannlíkt at hetta rættuliga fer at fáa øði í drotningina.