Stóra plastruddingin í Kyrrahavinum er steðgað
Stóra ætlanin at rudda plastikk upp úr havinum, The Ocean Cleanup, sum Mærsk Supply Service er partur av, er steðgað fyribils. Skip og flótibummur liggja nú í Hilo Bay á Hawaii. Flótibummurin vísti seg ikki at vera nær námind so effektivur, sum væntað, skrivar Maritime Danmark.

Málið var sett høgt: At burturbeina 90 prosent av øllum plasti í heiminum áðrenn 2040. Amboðið var ein flótibummur í hestaskógvasniði. Hann skuldi savna alt plastburturkastið úr havinum.

Royndarætlanin var sett í verk í oktober í fjør, tá Maersk Launcher sleipaði flótibummin 500 fjórðingar út í Kyrrahavið. Ætlanin skuldi varða í eitt hálvt ár, men tað var skjótt greitt, at skipanin ikki riggaði eftir ætlan.

Hálvanannan mánaða eftir, at skipanin varð sleipað út í Kyrrahavið, var hon sleipað inn aftur til lands. Síðani er onki hent.

Sambært Maritime Danmark er trupulleikin tann, at bummurin ikki heldur plastikkinum fast, eftir at tað kemur inn í hann, tað er, at plastið fer skjótt úr aftur bumminum. Haraftrat eru partar av bumminum loysnaðir og horvnir.

Tey, sum standa aftanfyri ætlanina, siga, at trupulleikarnir uttan iva verða loystir, soleiðis at Wilson, sum flótibummurin verður róptur, skjótt verður tilreiðar til eina nýggja royndarætlan har norðuri í Kyrrahavinum til heystar.

Maersk Supply Service hevur boðað frá, at felagið framvegis stuðlar ætlanini.

tað stendur at lesa á antares.fo.

Kelda: antares.fo / Maritime Danmark / Ingeniøren