Seinnapartin skrivaðu Visit Nólsoy og Tórshavnar kommuna undir avtalu, har Visit Nólsoy fær stuðulsjáttan frá kommununi afturfyri at reka virksemi lýst í sáttmála.

Endamálið og uppgávurnar hjá Visit Nólsoy eru í høvðusheitum at vegleiða og hjálpa borgarum og ferðafólki í oynni, skipa fyri og samskipa tiltøk.

Avtalan fatar millum annað um, at Visit Nólsoy í 2019 fer at virka fyri einum tættari samstarvi við Visit Tórshavn. Samstarvið kann millum annað fata um ítøkilig ferðavinnutiltøk, at Visit Nólsoy verður partur av ítøkiligum tiltøkum, sum annars fara fram í kommununi, og at Visit Nólsoy, tá ið hetta ber til, verður partur av vinnuferðavinnuni.

Visit Nólsoy arbeiðir við at samskipa og menna ferðavinnuna í oynni. Her ímillum at samskipa og menna nýggj ferðavinnutiltøk. Hetta verður gjørt í samstarvi við ferðavinnuna í oynni, soleiðis at Visit Nólsoy ikki kemur í eina kappingarstøðu við verandi ferðavinnutilboð. At menna ferðavinnuna snýr seg til dømis at fáa avtalur í lag við bóndir, um hvussu ferðafólk ganga í haganum.

Hetta er partur av avtaluni, sum Annika Olsen, borgarstjóri, og Bogi Andreasen, formaður í Vinnunevndini, fyri Tórshavnar kommunu og Tjóðhild Patursson og Barbara skrivaðu undir.