Fólk til gongu í London eru vorðin varnari við handtaskum og snildfonum í síðstuni, skrivar The Times, tí tjóvar á motorkrossum og –súkklum stjala alt handhildið og teir enntá stinga fólk niður við knívi, áðrenn teir rasa víðari. Tjóvurin (og knívstingarin) sita uppiá aftanfyri á súkkluni, og hin koyrir.

Fyri nøkrum árum síðan kundu fólk til gongu anda lættari, tá tey gingu við taskum á økslini og hildu snildfon í hondini, tí talið á vakmyndatólum øktist í stórum, og tey noyddu brotsmenninar á mopeds at vera varnari.

Løgreglan fekk eisini heimild til at koyra bil so dygst upp í súkklurnar, at tað bar til at koppa, koyra niður ella skumpa motorkrossurnar um koll, so búllar og tjóvar fóru singlandi eftir vegnum og fingu ofta skaða av tí nógvu ferðini.

Men gleðin hjá hampafólki varð stokkut. Skjótt varð lógin herd, og sum so ofta til brotsmansins fyrimun og offranna vansar. Tað endaði við, at búkropparnir vunnu sakir ímóti løgregluni, ið varð dømd fyri at skaða tjóvskar motorbúllar, hóast meinið stóðst av, at politiið feldi sekar brotsmenn av súkklum teirra.