Tað er royndur lutur, at eldri møður eru heilsuveikari enn ungar í barnsferð. Nú vísir ein risa kanning í California við 40 mió barnsburðum árini 2007-2017, at børn við eldri pápum eru somuleiðið í størri váða fyri heilsuveikleikum.

Menn yvir 45 ár hava 14% størri møguleika fyri at fáa ov tíðliga fødd børn enn pápar 25 - 34 ár, og 18% hægri sannlíki at fáa børn við fallsótt, epilepsi.

Fedrar yvir 55 fáa børn, ið 28% oftari krevja at fáa kuvøsu sum nýfødd. DNA og sáðkyknur hjá eldri monnum eru oftari veik. Granskarar halda, at tað er orsøk til veikleikar og heilsubrek hjá børnum teirra. Eldri menn smakka sær meiri á, venja minni og eru tyngri enn ungir, og tað ávirkar barnaheilsuna.

Michael Eisenberg, lækni við ábyrgd av kanningini, sigur, at menn eiga ikki at smikra seg sjálvar og billa sær inn, at teir hava minni skund at gerast pápar enn kvinnur. Foreldur at fyrstu børnum eldast í Vestanlondum. Tað merkir ikki, at vit hava ráð at drála. Tvørturímóti er betri at gerast foreldur tíðliga.